شرح تنصيب ويندوز xp

طبعا كلنا بنتعرض فى اى وقت من الاوقات انه يحصل اى شىء لا قدر الله فى سيستم جهاز الكمبيوتر بتاعنا انا قولت ان ممكن يكون فى ناس زيى كده بيعتمدو على حد ينزلهم نسخه جديده علشان ما يعرفوش ينزلو نسخه بس انا الحمد لله اتعلمت فحبيت انى اعلم اللى ما اتعلموش زى ما انا اتعلمت وان شاء الله انا ها اشرح خطوه خطوه وبطريقه مبسطه جدا


بسم الله نبدء

المطلوب هما حاجتين اتنين :

1 - جهاز سى دى و طبعا اغلب الاجهزة و ان مكانشى كلها دلوقتى فيها سى دى و يمكن دى فى دى

2 - اسطوانة ويندوز اكس بى xp ذاتية التحميل Bootable اى نوع سواء كان home eddtion او profissional و دى سهل انها تتجاب نسخة منها من اى مركز كومبيوتر او سيبر



الخطوة الاولى

ندخل اسطوانة الويندوز داخل السى دى و نعمل ريستارت للجهاز هنلاقى ان الاسطوانة بدات تشتغل
نضغط مسطره

الخطوة الثانية

هتلاقى ان لون الشاشة اتحول للون الازرق و تحت شريط باللون الرمادى و كلام فى الشريط كل شوية بيتغير كل دا كلام جميل و بكدا بدانا عملية تنزيل الويندوز و مش مطلوب مننا اننا نعمل اى حاجة خالص خالص لحد ما توصل لينا الصورة دى





و هى عبارة عن رسالة ترحيب يا اهلا و سهلا و منورنا و الله انك هتنزل الويندوز و بيديلك 3 اختيارات هتكمل العملية و لا مش هتكمل و تحت فى الشريط الرمادى هتلاقى الاختيارات دى طبعا احنا هنضغط على كلمة Enter لاننا عاوزين نكمل اما لو انت خايف و مش عاوز تكمل يبقى تضغط على F3

الخطوة الثالثة

طبعا بضغطك على على الخطوة السابقة هتتنقل على الخطوة اللاحقة و هتظهرلك على الشاشة بالشكل دا



طبعا انتوا شايفين الصفحة الطويلة العريضة دى كلها انا مش مطلوب منى غير انى اضغط على F8 و بس لانوا معناه انى موافقه على الكلام دا

الخطوة الرابعه

ركزوا معايا بقى يا شباب و يا بنات لانها خطوة مهمة جدا هتظهر ليكوا الرسالة بالشكل دا





الصورة دى بتوضح فين بالظبط انت عاوز تنزل ملفات السيستم طبعا فى اغلب الاجهزة بتنزل ملفات السيستم على البارتشنC علشان كدا لو انت جهازك فيه كذا بارتشن هتلاقى كل البارتشنات ادامك و المطلوب منك تختار البارتشن سى و تضغط على الزراز Enter

تحذير مهم : لازم تاخدوا بالكم كويس انكوا اختارتم البارتشن C لانكوا لو لا قدر الله اختارتم اى بارتشن تانى غيره يبقى ملفات السيستم هتنزل عليها و كل اللى فى البارتشن دا هيتشال علشان زى ما بقولكوا الخطوة دى مهمه جدا

الخطوة الخامسة

بعد كدا نتنقل للخطوة اللى بعد كدا و هى تحديد شكل الفورمات و تكون بالشكل دا




و يلاحظ انوا مديلك اربع اختيارات لشكل الفورمات FAT . NTFS . FAT (quick) . NTFS (quick و انت ليك مطلق الحرية انك تختار اللى يعجبك و ان كنت افضل انك تختار FAT و بعد كدا تضغط على Enter

الخطوة السادسة

فى الخطوة دى مش مطلوب منك غير انك تستنا لان فى الوقت دا الجهاز بيعمل فورمات للبارتشن C و بيشيل الملفات القديمه و يجهزه لاستقبال ملفات السيستم الجديدة و تكون بالشكل دا




و بعد ما تخلص الخطوة دى هتلاقى الخطوة اللى بعدها بنفس الشكل بس الملفات الجديدة هى اللى بتنزل و لما يخلص هيقولك ان الجهاز هيعمل ريستارت بعد 15 ثانية و الموضوع دا بياخد وقت بيعتمد على امكانيات و سعة جهازك عشان كدا ممكن انت وقتها تعمل كوباية شاى او تروح تصلى و ترجع

الخطوة السابعه

و فعلا الجهاز مكذبشى انوا عمل ريستارت فعلا و مش مطلوب منك اى حاجة تعملها الا انك تنتظر هتلاقى الجهاز بيعمل كل حاجة لواحدة و بيقولك ان ملفات السيستم بيتم تنصيبها دلوقتى و بيديلك وقت تقريبى 39 دقيقة و يبدء يقل مع كل عمليه بتتم و الله لو عاوز تستنى براحتك المهم عند الدقيقة 32 او 33 تقريبا هتلاقى رسالة ظهرت ليك بالشكل دا




و الرسالة دى مجرد تظبيطات احنا هنعملها سوا اول حاجة هنظبط اعدادات اللغة عشان نخلى الجهاز يدعم اللغة العربية هنضط على الزرار customize و منها هنلاقى رسالة متجزأة لثلاث شرايح اولها Regional option و التانية Languages و التالتة Advanced كل اللى هنعمل هنختار تانى واحدة اللى هى Language و نعلم صح على جنب كلمة install fiiels for complex scripts and right to left language و نضغط على زرار Apply كدا يبقى حطينا اللغه العربية فى الاعدادات

بعد كدا نرجع للشريحه الاولى اللى هى Regional option و نختار من الاختيارات Arabic egypt و تحت هتلاقى اختيار ال location هنختار Egypt

بعد كدا ننتقل للشريحة التالتة اللى هى advanced و نعمل نفس السيناريو اننا نختار Arabic egypt

و بمجرد ما نضغط على OK هنرجع لنفس الصورة اللى فوق و مش مطلوب مننا بعد كدا غير اننا نضغط على Next

الخطوة الثامنه

هتظهر ليكوا رسالة بالشكل دا



و مش مطلوب منكم غير انكم تحطوا اسم انتوا تختاروه فوق و تحت بس لازم يكون انجليزى و بعد كدا تضغطوا Next

الخطوة التاسعه

و هى خطوة وضع السيريال نمبر للاسطوانة هتظهرلكوا بالشكل دا


و المطلوب هنا وضع السيريال نمبر فى الفراغات الموجودة ادامكوا مع الاخذ فى الاغتبار ان فى اسطوانات مش محتاجة سيريال و فى اسطوانات بتحتاج عشان كدا لازم لما تجيبالاسطوانه تتاكد من الموضوع دا المهم اننا نضغط على Next بعد ما نحط السيريال


الخطوة العاشرة

هتظهر ليكوا الصورة دى


مش مطلوب منكوا اكتر انكوا تعملو Next من غير ما تحطوا adminstrator password او فى حاله confirm password الا فى حاله انك عاوز تحط باسورد على الجهاز


الخطوة الحادية عشرة

و هى ظبط الوقت و هتظهر بالشكل دا



كل المطلوب منك انك تعدل فى Time Zone و تختار Cairo و على فكرة انت اول ما هتغطى على السهم هتلاقيها اخر حاجة ظاهرة ليك تختارها و تضغط Next

الخطوة الثانية عشرة


هتظهرلك الرسالة دى مش مطلوب منك اكتر ضغط على Next




و نفس السناريو مع دى كمان


و انساه بقى ينصب ملفات الويندوز براحته انت لو مشغول او وراك حاجة لمدة ربع ساعه تقريبا روح اعملها و ارجع تانى بعد كدا هتلاقى ان الجهاز عمل ريستارت مش مطلوب منك غير انك تطلع اسطوانة الويندوز منشكرين عملت اللى عليها


الخطوة الثالثة عشرة

بعد الجهاز ما يعمل ريستارت سيبه براحته لحد ما تطلعلك الرسالة دى



و مش مطلوب اكتر من غير تضغط على OK


الخطوة الرابعه عشرة

مجرد حلاوة روح بقى لان خلاص السيستم نزل على الجهاز



مش اكتر من انك تضغط على Next



و هنا بيطلب منك انك تعمل اب ديت لنسخة الويندوز بس انت تختار الاختيار التانى اللى هو Not right now و تضغط على Next بعدها



مش اكتر من انك تضغط على skip


هنا بقى هو بيسالك انت عاوز تسمى اسم الجهاز ايه عشان لو ظهر على شبكه النتورك و طبعا انت حر اختار الاسم اللى يريحك و لو مختارتش هو هيختار متقلقش المهم اعمل Next فى نفس الوقت كفاية اسم واحد لو عاوز


طبعا الخطوة دى مش محتاجة شرح و بيقولك متشكرين تعبناك معانا المهم اضغط Finish

الخطوة الاخيرة

خلاص كدا خلصنا تنصيب سيستم اكس بى على الجهاز و معدتشى ناقص غير انك تحط اسطوانة التعريفات الخاصه بالبوردة عشان النظام يتعرف على كروت الشاشة و الصوت و اللان الخ و هى بمنتهى البساطة تجيب اسطوانة التعريفات و تحطها فى السى دى و تعرف الكروت و تعريفات كروت البوردة انت تنصب البرامج اللى انت محتجاها و بس





تبقى كلمة اخيرة

شفتوا بقى الموضوع سهل و فى منتهى البساطة ازاى و لا محتاجين نروح لسيبر و لا نروح لمركز كومبيوتر لان اللى انا شرحته هو بالظبط اللى بيعملوه لا اكتر و لا اقل